Aiarako udalaren maskota izango dena aurkeztuko du udalak
Aiarako Jaiak ospatuko dira apirilaren 27tik 29ra bitarteko asteburuan. Ugariak dira hiru egun horietarako antolatuak dauden ekintzak: Hockey txapelketak, dantzak, umeentzako ikuskizunak, bazkariak, erromeriak…
Larunbaterako dago programatua Aiala Folk Jaialdiaren lehenengo edizioa. Kontzertu bat eskaintzera animatzen zen talde orori aukera bat emateko antolatu du udalak jaialdi hori. Hala, lau dira lehenengo edizio honetan jotzera animatuko diren taldeak: Dagreim, Joy of convolution, Goaz eta Laramie. Kontzertuen ostean diskodantza egongo da eta ondoren DJ Agilak emango dio bukaera gauari.
Aurtengo pregoilaria Javier Angulo Gotxi izango da, 1968tik Arespalditzako Abadea dena. Etxaurrengo Jaien eta Aiaraldeko lehen abere lehiaketaren aitzindaria da Javier, Aiarako Udalak adierazitakoaren arabera.
Jaiak direla eta, ezohiko autobus zerbitzua jarriko da martxan. Lanteno, Menagarai, Ibarguen, Laudio, Luxaondo, Amurrio eta Murgatik igaroko dira zerbitzu horren baitako busak. Busen ordutegia, egitaraua eta jaietako kartela argazkiaren behealdean daude.
Prontxi barraskiloa
Aurtengo jaietako berrikuntzetako bat Prontxi barraskiloa da, Aiarako Udalaren maskota. Jaietan ez ezik, Udalaren kultura, kirola, gazteria, euskara eta gizarte arloetan ere bere presentzia izango du aurrerantzean barraskiloak. Txupinazoa jaurtitzearekin batera aurkeztuko dute, apirilaren 27an, arratsaldeko zazpietan.