Aiarako Udalak poligonoan dituen azpiegituren kudeaketa Kantauriko Urkidetzak egingo du. Hala erabaki zuten atzo udal osoko bilkuran. Aiara Batuzek aurka bozkatu zuen, izan ere, bere ustez eztabaidatu behar da udalaren protagonismoa partzuergoan.
Administrazio Batzarrek, orain arte bezala, euren esku izango dute kudeaketa.
Horrez gain, azpiegiturei lotutako zenbait ekimen onartu zituzten.
Las Vegas tabernaren inguruan aparkalekua
Udalak hitzarmena abiatuko du Las Vegas tabernaren atzean dagoen lurzorua erabiltzeko aparkalekua egiteko. Gune berdea ere jarriko dute.
Horretarako, jabearekin akordioa lortu dute. EH Bildu abstenitu zen bozketan eta teknikarien azalpenak nahi zituztela adierazi zuten.
Zuhatzan telebista errepikagailua
Itelazpi Eusko Jaurlaritzako enpresak telebista errepikagailuan hobekuntzak egin ditzan hitzarmena onartu zuten atzo ere. Zuhatzan dago tresna eta lur zabalera gehiago okupatuko ditu hobekuntzen ostean.
Udalaren lehenengo isuna enpresa bati
Udalak, Eusko Jaurlaritzak eta Arabako Foru Aldundiak ordaindu zituzten udan zenbait lan Etxaurren Ikastolan. Obra horiek berandu gauzatu zituen eraikuntza enpresak eta, hori dela medio, Aiarako Udalak lehenengo aldiz isuna jarriko dio enpresa bati kontratuko epeak ez betetzeagatik.