"Beti da pozgarria taldeka lasterketa bat irabaztea". Hala eman zuten jakitzera Aiarako Txirrindulari Elkarteko arduradunek lasterketaren ostean. Zornotzako Udaberriko Sarian hartu zuten parte 188 txirrindularik, eta banaka podiuma zapaltzea lortu ez bazuten ere, taldeka lehen sailkatua izan zen eskualdeko elkartea. Emaitzari buruz, poza nabarmendu zuten taldekideek: "Zornotzako Udaberri Sariak tradizio eta garrantzia handia du".
Arabarrekin batera abiatu ziren kirolari bizkaitarrak, gipuzkoarrak, nafarrak, kantabriarrak eta Gaztela-Leoikoak. "Goi mailako txirrindularitza ikusi zen, lasterkari asko, errepide estuak, tentsioa...".
Eskualdekotaldearen inguruan, uneoro ondo kokatuta joan zirela aipatu dute arduradunek, "mozketetan presente eta ihesaldiei adi". 41 kilometro orduko abiaduran aritu ziren, bataz beste; eta, ondorioz, ihesaldian sartzea ez zen erraza izan. "Espero bezala bukatu zen karrera. Ehun bat txirrindularik jokatu zuten azkeneko sprinta, eta Hodei Murcia (Elproex) izan zen azkarrena, nagusiki gailenduz". Aiarako Txirrindulari elkarteak taldekako kategorian jaso zuen egindako lanaren emaitza. "Prestigiodun garaipena da, bide beretik jarraitzera animatzen gaitu. Ikasten jarraituko dugu".