Bideo bat egingo dute igandean Aiarako Emakumeen Gelan, Emakumeenganako Indarkeriaren Aurkako Nazioarteko Eguna dela eta. 12:00etan hasiko dute grabaketa, Gatibu taldearen “Aske maite, aske bizi” abestiaren erritmora. Udalerriko elkarte eta norbanako orori luzatu diote bertan parte hartzeko gonbita.
Azaroaren 25ean proiektatuko dute eginiko lana, ordu eta toki berean. Ondoren elkarretaratzea egongo da Ferialean, eta Luiaondora joko dute gero, auto-ilaran. 13.10ak aldera egingo dute bertan kontzentrazioa, eta txori moreak eta kartelak jarriko dituzte indarkeria matxista salatzeko, “Ez da ez” leloarekin.
Berdintasun topaketak azaroaren 17an
Horrez gain, Berdintasun Topaketak egingo dituzte datorren azaroaren 17an -larunbata-, Arespalditzan. Egitarau oparoa prestatu dute: Josebe Iturriozen hitzaldia, Artziniegako Hiriska emakume taldearen antzezlana, “world kafea”, Virginia Imazen “klownklusioak”, bazkaria eta karaoke feminista egongo dira.
Topaketan parte hartzeko beharrezkoa izango da aurretik izena ematea cayala.miren@ayto.araba.eus helbidera mezu bat bidalita edo 686587889 telefonora deituta. Haurtzaindegi eta garraio zerbitzua eskainiko dituzte, hiru egun lehenago abisatuz gero.
