Arespalditzako osasun zentroaren inguruko irisgarritasuna hobetuko du udalak

Arespalditzako anbulatorioa./ aiaraldea.eus

34.981,61 euro baliatuko dituzte obra horiek egiteko. Espaloi bat luzatu eta aparkatzeko zonalde berria egokituko dute, besteak beste.

Hainbat egokitzapen egingo ditu Aiarako Udalak Arespalditzako osasun zentroaren inguruan, gunea irisgarriagoa egiteko helburuarekin.

Alde batetik, modu malkartsuan etenda dagoen espaloi zati bat luzatuko dute, osasun zentrora oztoporik gabe heldu ahal izateko. Kontsulta dagoen eraikineko fatxadaren albotik joango da espaloi hori, aparkaleku kopurua handitzeko espazioa libre utzita.

Hori da obren bidez egingo duten beste gauza bat: aparkatzeko zonalde berri bat egokitzea. Horrez gain, “ezgaitasunen bat duten pertsonentzako eta anbulantziarako aparkaleku bana” eraiki nahi dituzte, udalak jakinarazi duenez. “Inguruko bizilagunen eskaerei, baita osasun zentrora jotzen duten gainerako herritarrei erantzuna ematen dion hobekuntza proiektua da”.

Tokiko erakundeak nabarmendu du obrek kirol-pistarako oinezkoentzako pasabidea planteatzeko beta emango dutela. “Era berean, aukera egongo da zakarrontzientzako espazio bat egokitzeko”.

34.981,61 euro baliatuko dituzte lanak gauzatzeko. Arabako Foru Aldundiaren Obra Txikien diru-laguntzen deialdira aurkezteko asmoa du udalak, finantzaketa lortzeko xedearekin. Onartuko balute, 2019an egikaritu beharko lukete.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide