Gaur goizean izan da Aiarako laugarren mendi duatloia. Eguraldia lagun, makina bat kirolari eta herritar hurbildu dira Arespalditzako kirol ekimenera. Haurrek hasi dute proba (2009-2012 artean jaiotakoek) eta euren ostean egin dute lasterka 2006-2008 bitartekoek. Adinaren arabera egokitu dute zirkuituaren luzeera, eta 20tik gora lagun batu dira jarduerara txanda bakoitzean.
11:00etan atera dira helduak irteera gunetik. Antolatzaileen esanetan, orotara 48 dortsal banatu dituzte banakako kategorian; eta 25, aldiz, binakakoan.
Txapela, eskualdekoentzat
Emakumezkoen artean Zuriñe Frutos izan da bizkorrena, eta gizonezkoen modalitatean Iñaki Isasi. Erreleboka, berriz, Iñaki Carro eta Sergio Markina gailendu dira.
Bigarren postuak Bakarne Almazan, Mikel Loizaga eta Iñaki Zendoia-Pedro Urkijo bikotearentzat izan dira. Hirugarren sariak, ostera, ondorengoek jaso dituzte: Maite Aldazabalek, Iosu Isasik eta Alberto Talledo-Joseba Garcia bikoteak.
Denbora markak
Duatloia osatzen azkarrena Iñaki Isasi Flores izan da, 1:08:10 segundoko markarekin. Bi minutu eta 20 segunduko aldea atera dio Mikel Loizaga bigarren sailkatuari. Alabaina, errelebokako bikote garaileak (Iñaki Carro eta Sergio Markinak osatutakoak) 52 segunduko abantaila lortu du Isasirekiko, 1:07:16 segundutan bukatu baitu proba. Emakumeen artean Zuriñe Frutos izan da lasterren bukatu duena zirkuitua (01:32:47). Bigarren neskak (Bakarne Almazanek) baino 15 minutu gutxiago behar izan ditu artziniegarrak proba bukatzeko.
Argazkiak: Txabi Alvarado Bañares