Larunbatean izango da Agiñagako Jaien egun nagusia. Ospakizunak aisialdia eta ingurumena uztartuko ditu. Berez, 10:00etan elkartuko dira herrian; eta Maroñora joko dute, urtegiko inguruetara, hain zuzen. Han bisitariek uzten dituzten zabor guztiak jasoko dituzte. Antolatzaileek eskularruak eta poltsak banatuko dituzte eta, horrez gain, azalduko dute zeintzuk diren gune horren balio naturalak: ur hegaztiak, landareak, animaliak...
Enrique Arberas biologoa da antolatzaileetako bat, eta argitu du gero eta jende gehiagok erabiltzen duela lekua. Ondorioz, hondakinak eta errespetu falta biderkatu dira: "Atzerriko jendea ere etortzen da, sare sozialen eraginez, suposatzen dut". Joera hori aldatzeko deitu dute "Basuraleza" ekimena. SEO Birdlife GKEk abiatu zuen jarduera eta agiñagarrek eskualdera ekarri nahi izan dute.
Ekintza gehiago
Aldarrikapena ez ezik, entretenimendua ere baliatuko dute jaietan. Ostiralean meza, pintxo jana eta zozketa antolatuko dute 13:00etatik aurrera, eta larunbatean egitasmo ekologistaren ostean pintxo-potea egingo dute.
18:00etan Jose Luis Urrutiaren antzezlan komikoa eskainiko dute: "La chica de la maleta roja". Ordu berean umeek puzgarriak izango dituzte eta 20:00etan igel toka txapelketa hasiko da. 21:00etan parrilladaren ordua helduko da eta ordu erdi beranduago Sabin Guarestiren kontzertua egongo da.