Ikastaroa eskainiko du Aiarako Udalak Bizi zaitez bizi programaren barruan. Udalerriko edadetuei bideratutako egitasmoa izango da, datorren astelehenean -urriak 7- hasiko dena. Luiaondoko Eskola Zaharretan jarri dute zita, 17:30ean. Ikastaroa doakoa izango da, baina plaza kopurua mugatua egongo da. Horregatik, aldez aurretik izena emateko deia luzatu dute, 945 399 013 telefonora deituta.
Unai Arrietak eskainiko du tailerra. “Iaz egin genuen lehen edizioa eta parte hartze handia egon zen, bertaratutako pertsonek aktiboki hartu zuten parte”, azaldu du psikologoak Euskadi Irratian eginiko elkarrizketan. “Asko hitz egiten da zahartze aktiboaz. Bizitzea zahartzea da, eta zahartzea bizitzea da. Ohitura batzuk hartzean datza ikastaroa, gehiago eta hobeto bizitzeko”.
Arrietaren aburuz, Aiarak “ezaugarri bereziak” ditu, “eta hori kontuan izan behar da nagusiei gomendioak ematerako orduan”. Zentzu horretan, horrelako programek udalerriko herrietako nagusien topagune bezala ere funtzionatzen dutela nabarmendu du adituak.