Maied Urrutia BAFFEST argazki lehiaketako 5. edizioan egoteko hautatu dute. Aiaran bizi den argazkilariak aurretik ere parte hartu du ekimenean eta duela 2 urte 20 lan onenen artean hautatu zuten berea.
Aurten, ordea, 8 finalisten artean egongo da Urrutiaren argazkia. Horren izenburua da Neu 30 aldiz eta egilearen hitzetan: “Proiektuaren helburua da adieraztea 30 urte betetzeak sortzen duen krisialdiak nola sentiarazten nauen. Horren bitartez, gazteria, nolabait, atzean uztean eta helduaroan guztiz sartzerakoan sumatzen den aldaketaren beldurra eta aldaketa horren aurreko erresistentziari buruz mintzatzen saiatu naiz, hau guztia, identitateari estu loturik dihoala”.
Hasieran, maiatzean gauzatu behar zuten ekimena, 4tik 31ra, hain zuzen. Hala ere, COVID-19a dela medio, urriaren 1etik 31ra mugitu dituzte datak. Gainerako finalistak Maria Azkarate, Leire Zabaleta, Yone Estivariz, Maria Sanchez, Eider Moreno, Miren Barrena eta Ana Martin dira. Guztira, 55 lan jaso ditu antolakuntzak.
BAFFEST jaialdiak babesten ditu beren lana ezagutzera ematen ari diren emakume argazkilariak. EAEko artistak izan behar dira eta euren lanak Barakaldon erakusten dituzte, euskarri handiak baliatuta. Irabazleak 2021ko edizioan bakarkako erakusketa izango du eta 300 euroko saria jasoko du.