"Aldebakarreko erabakia izan da udal gobernuak herri koloniak ez antolatzea". Hala nabarmendu du Aiarako EH Bilduk prentsa oharrean. "Familien ezinegona eragin du erabakiak, jakin dugunez", erantsi dute. Aiara Batuz eta EH Bilduk ez dute udako jardueren inguruko informaziorik jaso, "eta ez-ohiko uda honetan txikienentzat jarduerak jartzeko beharra azaldu genuen, lan eta familia bizitzak uztartzeko batik bat". Gobernu taldeak eskaera zail ikusi zuen, antolakuntzak ibilgailua erabili beharra suposatuko lukeelako. EH Bilduren iritziz, egunerokotasunean oso errotuta dago mugikortasuna Aiaran, "eta udalekuen eskaintzak funtsezko zerbitzuak dira familia askorentzat kontziliazio eta sozializazio ikuspegietatik. Are, datorren ikasturtea aurrekoekiko ezberdina izango denean". EH Bilduren ustez, haurrentzat onura asko dituzte udalekuek, pandemiak eragindako egoeren ondorioz.
Horregatik, aurreikuspen falta leporatu diote gobernu taldeari: "Ziurrenik hori izan da udalekuen zerbitzua kontratatzea eragotzi duena, baina beste behin ere oposizioarekin kontatu gabe hartu dute erabakia, eta hau gehiegi errepikatzen den sekuentzia da. 7 zinegotzi izanik, EAJk bermatua du bere borondatea, baina funtzionamendu demokratikoak bestelako gai batzuk mahaigainean jartzea dakar, eta beste indarrekin kontrastatu beharra. Bestela galtzen ateratzen direnak, kasu honetan bezala, Aiarako familiak dira".
Gobernu taldearen erantzuna
Gentza Alamillo alkateak gobernu taldearen jarrera berretsi du, Aiaraldea Komunikabideari eginiko adierazpenetan: "Hausnarketa egin eta gero hartu genuen erabakia". Jeltzaleen aburuz, jende kopurua eta espazio falta ere izango lirateke arazo, jarduerak antolatuko balira: "Aiara osoan sakabanatuta izan beharko genituzke haurrak bestela. Aspaldi horrela egiten zen, baina Luiaondon eta Arespalditzan zentratu genituen udalekuak gerora, jendeak hala eskatuta". Horrez gain, eguraldia medio ekintza batzuk lokal barruan gauzatu beharra ere oztopotzat jo dute: "Ez ginateke gai izango jendearen eskaerari aurre egiteko. Laudioko Tenis Udalekuetan eta beste toki batzuetan zer gertatu den ikusita, erabaki ona izan dela uste dugu".