Aiarako Txirrindulari Elkarteko kideak emaitza onak lortzen ari dira udako probetan. Larunbatean Zumaian (Gipuzkoa) izan ziren, Nafarroa, Araba, Bizkaia, Gipuzkoa eta Ipar Euskal Herriko beste zenbait txirrindularirekin batera antolatutako lehiaketan.
Aiarako Txirrindulari Elkarteak sare sozialetan nabarmendu duenez, oso ondo antolatutako norgehiagoka izan zen, Arritxu Iribar esatariaren gidaritzapean. Guztira, 168 txirrindulari lehiatu ziren, Euskal Herri osokoak. Horien artean gailendu zen Gabriel Ibañez, bigarren helmugaratu baitzen aiaraldearra.
Uda biribila
Denboraldi biribila osatzen ari da Ibañez. Izan ere, aurreko astean hirugarren sailkatu zen Legariako txapelketan. "Los Arcoseko karreran zortzigarren geratu zen, esprintean azkarregi arrankatzeagatik", zehaztu du taldeak, "lezioa ikasi zuen, taldekako esprinta irabazi zuen Zumaian, nahiz eta Vlad Rares (Irungo DINUY taldekoa) ezin harrapatu". Ihesean zetorren Rares, baina segundo bakarreko tartea atera zion Aiarako kideari.
Bihar izango dute hurrengo norgehiagoka Aiarako txirrindulariek Lakuntzan (Nafarroa).