Izoriako gaztandegian egon ziren atzo Arantxa Tapia Ekonomia Garapen Sailburua eta Bittor Oroz Nekazaritza, Arrantza eta Elikagaien Politikako Sailburuordea, 'Euskal Gaztak' proiektua aurkezten.
Eusko Label ziurtagiria duten ahuntz, ardi eta behi esnearekin egindako sei gazta aurkeztu dituzte, Izorian bertan ekoiztutako bat tartean.
Sei barietate berri horiek Idiazabal Jatorrizko Izendapenak babestutako produktuen eskaintza babestera datoz. Gaztek “etiketa propioa izango dute merkatuan, identifikagarria izan dadin kontsumitzaileentzat”, azaldu zuen Bittor Oroz sailburuordeak.
Arantxa Tapiaren hitzetan, “baserrietako antzinako gaztagintza berreskuratzea eta esne sektorearen lehiakortasuna handitzea” dira ekimenaren xedeak.
Otzara, Izorian egina
Fraisoro, Otzara, Saroi, Latxa Urdina, Txuria eta Auntza dira atzo aurkeztutako sei gazta barietateen izenak. Otzara da Aiaraldeko Izoria gaztandegian ekoiztutakoa. Ardi esnearekin eginiko “formatu txiki eta dotoreko” produktua da, “mendebaldeko amama gaztaginen lekuko”.