Udalerriko Irisgarritasun Plana berritzeari ekin dio Aiarako Udalak. Proiektuaren idazketa esleitu du tokiko erakundeak, 11.495 euroren truke.
Bertan jasoko dituzte irisgarritasun arloan emandako aurrerapenak eta dauden beharrak. Horretarako beharra zegoela nabarmendu du udalak, mota horretako azken dokumentua 2007koa delako. “Tresna honi esker, oztopo arkitektonikoak kentzeko jarduera-ildo nagusiak eman ahal izango zaizkio udalerriari, bai eta jarduketa berriak 'guztiontzako diseinuaren' irizpidearen arabera egiteko jarraibideak ere”.
Gentza Alamillo alkateak azaldu duenez, dokumentu horrek ahalbidetuko du “altzarien, eraikinen eta zentro publikoen egungo egoera” zein den jakitea. Modu horretan, dauden beharrak identifikatuko dituzte, gero Eusko Jaurlaritzan irisgarritasuna hobetzeko diru-laguntzetara aurkeztu ahal izateko, plan bat izatea funtsezko baldintza baita deialdi horietan.
Administrazio batzarrekin elkarlanean
Lan hori administrazio batzarrekin elkarlanean egingo dela nabarmendu du gobernuburuak. "Lan hori sakon egitea nahi dugu, eta, horretarako, kontratatutako enpresa Aiarako Administrazio Batzordeetako presidente guztiekin harremanetan jarriko da, dauden behar guztiak bilduko dituen inbentario oso bat diseinatzeko". 23 administrazio batzar ditu guztira Aiarak, Luiaondo da populatueta eta Arepalditza, aldiz, hiriburua. Horregatik, ordezkaritza-organo horiek “funtsezko eginkizuna dute udalerriaren garapenean eta aurrerabidean", alkatearen hitzetan.