Proiektu berri batean murgilduta dago Aiarako Kuadrilla, Vital Fundazioarekin elkarlanean. “25 etxe berdez osatutako sarea ehuntzea” du helburu tokiko erakundeak, “beste kuadrilletako beste etxe batzuekin batera motore gisa jardun dezaten etxe barruko ohiturak hobetzeko bidean”. Arabako beste kuadrillak ere batu dira ekimenera, eta 120 etxe batu nahi dituzte guztira egitasmoan.
“Eguneroko erabakiek eta ohiturek ingurumenean eta gizartean duten eraginagatik kezkatuta dauden familiak” inplikatu nahi dituzte egitasmoan, “mota ezberdintekoak”.
Proiektuan parte hartu nahi duten sendiek apirilaren 22ra arte izango dute izena emateko aukera 945 776 858 telefonoan. Etxeko kudeaketa “arduratsuagoa” sustatuko dute, “uraren eta energiaren etxeko kontsumoaren autokontrola sustatuz, aurrezteko neurriak eta jokabideak sartuz eta erosketa etikoagoa eta ekologikoagoa egiten lagunduz”.
Hiru urtez luzatuko da ekimena. Hau da lehen urtean egitea aurreikusi dutena: “parte-hartzaileek beren etxeetan ur eta energia kantitate esanguratsua aurrezteko eta beren hondakinen kudeaketa egokia egiteko erronkari aurre egitea. Amaitzeko, tailer eta jarduera praktikoak egingo dira, proposatutako gaietan sakontzeko eta lanean jarraitzeko”.