Bost zuzenketa proposatu ditu EH Bilduren udal taldeak Aiarako 2021eko udal-aurrekontuen proiektuari begira. Etxaurren Ikastolako jantokia eta sukaldea beste toki batera aldatzea da ideia nagusia. Proposamen horrekin, bi azpiegiturek behar dituzten hobekuntzei erantzun eta ikastetxeko espazioa handitzea da EH Bilduren asmoa.
Bestetik, udalerriko herrien arteko bide-sare bat sortzea ere proposatu du koalizio abertzaleak, "bizilagunentzako gune osasungarriak sortzeko eta gaur egun existitzen ez diren turismo-jarduerei lotutako azpiegiturak sortzeko". Horretarako, 5.000 euroko inbertsioa egitea da taldearen proposamena.
Inbertsio berdina mahaigaineratu dute Luiaondon bizikletak garbitzeko gune bat sortzeko, Karmele Poblacón bozeramailearen hitzeta: “beharrezko azpiegitura dela uste dugu, batez ere BBTren zaleak ugaritu egin direlako eta lokatza garbitzeko behar dituztelako”.
Bestetik, udalerriko garraio publikoko gune nagusia den Luiaondoko tren geltokia egokitzeko premia azpimarratu du EH Bilduk. Nerbioiko Parke Lineala erabiltzen duten herritarrek ere baliatzen dute geltoki hori. Horregatik, komun publiko bat atontzetik hastea proposatu du talde abertzaleak.
Kultur jarduerak gauzatzeko inbertsioa
Azkenik, 3.000 euroko diru partida bat gordetzeko beharra azaldu du talde politikoak, kultur jarduerak antolatzeko helburuarekin.
EH Bilduk aurkeztutako bost zuzenketek 23.000 euroko inbertsioa ekarriko lukete guztira. Diru partida hori erabiltzen ez diren bestelako partida batzuetako sosekin osatzea eskatu dute: "Gaztelekuaren proiektu amaigabetik, inoiz gastatzen ez diren administrazio-batzarrentzako zerbitzuetatik, orain itxita dagoen turismo-bulegoa mantentzetik edo korporazioarentzat erreserbatutako garraio-dietetatik".