Iaz San Prudentzio Jaiak balkoietatik edo etxetik ospatu zituzten Aiarako herritarrek. Aurten eredua ez da bera izango baina, pandemiaren ondorioz, salbuespeneko egitaraua prestatu du tokiko erakundeak. Udalak jende oro hartu du aintzat, baina haurrek eta gazteek protagonismo berezia izango dute.
Esaterako, marrazki lehiaketa egongo da eta 4 kategoria egongo dira: 2 ta 5 urte bitartekoa, 6 eta 8 urte bitartekoa, 9 eta 12 urte bitartekoa eta 12 urtetik gorakoena. Parte hartu nahi dutenek bere lanaren argazkia bidali beharko dute aiarakojaiak@aiarakoudala.eus helbidera. Obrak "Nola ospa ditzakegu aurten gure herriko jaiak?" leloa jaso behar du eta bidaltzeko epea apirilaren 20an amaituko da. Maila bakoitzeko 50 eta 40 euroko sariak banatuko dituzte.
Gazteenak ere izango dira apirilaren 28an egingo diren tailerren publikoa. 11:00etan izango dira Arespalditzan, Luiaondon, Lantenon eta Izorian. Izena emateko udaletxera deitu beharra dago (945 39 90 13). Parte hartzaileei eskatuko diete zuriz jantzita joatea, saioen ardatza sanprudentzioak izango baitira. Egun berean 19:00etan filma proiektatuko dute Luiaondon adin guztietako ikusleentzat.
Kirolari dagokionez, kadete kategoriako txirrindulari gazteek apirilaren 25ean hartuko dituzte Arespalditzako kaleak eta errepidea 09:30etatik aurrera. San Prudentzio Sariaren XL. edizioa izango da eta Euskadiko Txapelketaren barruan lehiatuko da.
Dantzak
Edonola ere, Aiarako Udalak bi hitzordu aurreikusi ditu jendea batzeko, segurtasun distantziak bermatuta, hori bai. Horretarako, ilaran egiten diren dantzen bi saio deitu ditu; apirilaren 16an eta 23an, biak 18:00etan. Arespalditzako pista estalian egingo dira eta interesdunek izena eman beharko dute aurretik 945 39 90 13 telefonora deituta.
Dantza mota horretan ilara paraleloak osatzen dituzte parte hartzaileek eta begirale batek proposatzen dituen mugimenduak eta urratsak egiten dituzte, euren arteko distantzia mantenduta eta elkar ukitu gabe betiere.