Ate joka daude Aiarako aurtengo jaiak eta EH Bildu udal-taldeak Aiaraldeko Greba Batzordea eta Tubacexeko langileak proposatu ditu txupina jaurtitzeko arduradun. Osasun neurri bereziek ez ezik, dagoeneko 68 egunez luzatu den Tubacexeko langileen greba mugagabeak ere markatuko ditu aurtengo herriko jaiak. Horregatik, udal-taldeak bi kolektiboei eskaini die jaiei hasiera elkarrekin emateko ardura.
Tubacexek 129 langile kaleratzeko hartutako erabakiak eskualde osoan eragina izango duela nabarmendu du koalizio abertzaleak, eta lanpostuen suntsiketaz gain gazteen prekarizazio tasa ere aipatu dute. Egoera horretan, Aiaraldeko Greba Batzordearen garrantzia ere nabarmendu dute: "Aiaraldeko Greba Batzordea bezalako herri mugimendu asanbleario bat hainbat sektoreren borroka biltzen ari da enplegua suntsitzearen aurka eta Aiaraldeko herritarrentzako etorkizuna defendatzearen alde, baldintza duinak dituzten enpleguekin".
Txupinazoa
Lanpostuen defentsan egindako borrokari aitortza egiteko asmoz, EH Bilduk bi kolektiboen ordezkaritzari luzatu nahi die herritar guztien aurrean txupina jaurti eta pregoia irakurtzeko gonbita.
Osasun-neurriak errespetatzeko, jaien hasierako ekitaldia bideoz jaso eta hau zabaltzea da koalizioaren proposamena, "udalaren webgunearen eta agerkari digitalen bidez".