Apirilaren 22an onartu zituen Aiarako Udalak 2021eko aurrekontuak. Zehazki, aurten 2.268.152,47 euro baliatuko ditu tokiko erakundeak. Udal Gobernu Taldeak nabarmendu du hainbat urteren ostean -2008tik alegia-, enplegu publikoaren eskaintza abiatuko duela tokiko erakundeak. Alde batetik, plaza berria sortu eta administrazio orokorreko teknikaria kontratatuko dute. Bestetik, administrari baten plaza finkatuko da, egungo langileak berrezartzeko planaren barruan.
Horrez gain, lan poltsak ere osatuko dituzte behin-behineko hutsuneak betetzeko, bai administrarien zein peoien artean.
Administrazio batzarrak
Diru-laguntzei dagokienez, elkarteek zein Administrazio Batzarrek jasotzen dituztenak mantenduko dira. Kontzejuen kasuan, 35.000 euro egongo dira lan teknikoak ordaintzeko eta beste 35.000 obrak finantzatzeko. Gainera, aholkularitza jasoko dute Jasangarritasun Legea bete dezaten. Berdintasun Sailak 11.000 eurora igoko ditu bere bitartekoak, iaz argitaratutako liburua euskaratzeko, besteak beste.
Ostalaritza, turismoa eta abeltzaintza
Pandemiak kaltetutako sektore ekonomikoa izan dira, bereziki, ostalaritza eta turismoa. Horregatik, 15.400 euro bideratuko dira tabernen eta landa-etxeen jarduera babestera.
Halaber, aurtengo San Isidro azoka bertan behera utzi denez, 18.000 euro gordeko dira abeltzaintza sustatzeko zenbait ekintza antolatzeko, baldin eta osasun egoerak ahalbidetuko balu.
Obrak udaletxean
Inbertsioen esparruan nabarmendu beharra dago udaletxeko goiko solairuan esku hartuko dutela bulegoak eraikitzeko, oraingo zein laster batuko diren langileentzat. Izan ere, Aiarako Kuadrillako teknikariek ere bertan dute lanpostua eta eremua egokitu nahi dute, herritarren mesederako. Azkenik, Hiri Antolamendurako Plan Orokorrarekin aurrera egiten jarraituko du Aiarako Udalak, agindu bezala, eta 32.700 euroko bitartekoak bideratuko ditu horretara.