Larunbatean Aiara Txirrindularitza Elkarteak Grupo Eleyco Valle de Arana proban parte hartu zuen. Lasterketa gorabeheratsua izan zuten, baina emaitzekin oso pozik bukatu zuten. Izan ere, podium bikoitza eskuratu zuten aiararrek. Alde batetik, talde onena osatu zuten -bere 11 kideek amaitu zuten ibilbidea-. Bestetik, Tami Navarro txirrindulariak 3. postua lortu zuen.
Edonola ere, ez zen erronka erraza izan. Iñigo Uriak eta Oier Colmenerok erorketak izan zituzten, baita arazo mekanikoak ere. Guztira, Hego Euskal Herriko 26 talde aritu ziren, 151 txirrindulari.
Hala ere, aiararrek protagonismo handia izan zuten. Bi itzulik osatzen zuten ibilbidea eta lehenengoan Jon Conejerok ihesaldia egin zuen eta bakarrik lideratu zuen sailkapena ia buelta osoan. Gero Tami Navarrok ekin zion ihesaldiari, eta Iturrietako gainera heldu baino apur bat lehenago harrapatu zuen tropelak.
Dena den, Navarrok 3. zeharkatu zuen helmuga. Jon Conejero 9. izan zen eta Hodei Muñoz 16. sartu zen. Kirol elkarteko arduradunen hitzetan emaitzak taldeak duen maila altuaren erakusle dira.