Jadanik ez dago Aiara BTT lasterketan parte hartzeko lekurik. Hori jakinarazi zion atzo Nagore Portillo Aiara Teameko kideak Aiaraldea Hedabideari. Guztira, zeuden 500 plazak bete dituzte eta itxaron zerrendan zeuden kirolariekin hasi dira harremanetan jartzen.
Uztailaren 3an egingo den lasterketa garrantzi handikoa izango da. Klub askok uko egin diotenez lasterketa antolatzeari, Aiaran erabakiko dira Arabako eta Euskadiko txapeldunak, Elite, Sub-23, Master 30, Master 40/50/60 eta emakumezkoen kategorien artean.
Garaipena lortu nahi dutenek 60 kilometroko eta 2 kilometroko desnibeleko ibilbidea bete beharko dute:
Horrez gain, 30 kilometroko ibilaldia egongo da lehiatzeko asmorik ez dutenentzat.
Proba bakarra egutegian
Esan bezala, egingo den lasterketa bakarra denez Araban zein EAEn, jende ugarik eman du izena eta asko dortsala jantzi gabe geratuko dira. Izan ere, pandemiaren ondorioz, prebentzio neurriak egongo dira eta parte-hartzaile kopurua mugatu behar izan dute.
Aiara Teamek jakinarazi du mendi txirrindula federazioarekin lan handia egin behar izan dutela arauak betetzeko.