Aiarako Udalak udalerritik amiantoa erretiratzea adostu du, EH Bilduren proposamen bati esker

Aimar Gutierrez Bidarte 2021ko aza. 20a, 08:00

2005az geroztik Europar Batasunean elementu debekatua da amiantoa.

Udal eraikinen diagnostikoa egin eta amiantoa erretiratuko dute Aiaran, baita legez kanpoko isurketak saihesteko sistemak abiarazi ere, EH Bilduk aurkeztutako mozioa aho batez onartua izan ostean.

Aiarako Udal Osoko Bilkurak aho batez babestu du EH Bildu udal taldeak aurkeztutako amiantoa erretiratzeko mozioa. Horrenbestez, udal erakinetan elementu kutsagarri horrek duen presentzia aztertuko dute, eta beharrezkoa den tokietan hori kentzeko planak abiarazi.

Onartutako testuak amiantoa kontrolik gabe ez erretiratzeko eta legez kanpoko isurketak saihesteko mekanismoen beharra ere azpimarratzen du. Baita obra-lizentziak eskatzerako orduan elementu kutsagarria detektatzeko antzemate sistema bat ezartzea ere.

“Nahiz eta 2005az geroztik Europar Batasunean elementu debekatua izan, gaur egun jende asko bizi da amiantorekin, eta kasu askotan, osasunarentzat zer eragiten duen jakin gabe. Ez dakigu zenbat dagoen eta non dagoen” azaldu du Karmele Poblacion udal talde abertzaleko zinegotziak.

Udalak konpromisoa hartu du, udalbatzan horrela ebatzita, gaur egun indarrean dauden laguntza ekonomikoak aztertzeko. Amiantoa erretiratu edo egokitu behar duten partikularrak laguntzea da helburua.

Amiantoaren gaia, Madrilen hizpide

Espainiako Gobernuaren aurrekontu orokorrak eztabaidatzen ari dira egun hauetan Madrileko (Espainia) Diputatuen Kongresuan. Espainiako Gobernuak 25 milioi euroko diru sail bat onartu du amiantoaren biktimen konpentsazio funtsa sortze aldera. EH Bilduk berak proposatu zuen 2022ko aurrekontuetan zuzenketa hori sartzea, eta PSOE eta Unidas Podemosek alde bozkatu zuten.

Politika Aiara

Erlazionatuak

EH Bilduren oharra, osorik

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide