Euskadiko zein mugaz kanpoko txapelketetan ari dira lehiatzen Aiara Txirrindulari Elkarteko gazteak. Larunbatean Kantabriara jo zuten Puente Viesgoko ziklokros proban parte hartzera, eta lehen postua eskuratuta itzuli ziren eskualdera. Hain zuzen, Hodei Muñozek lortu zuen lehen postua:
Aiara Txirrindulari Elkarteak sare sozialetan adierazi duenez, "bikaina" izan zen gaztearen norgehiagoka: "Sekulako emaitza lortu du Hodei Muñozek, garaipen bikainarekin". Ez da, gainera, aurten podiuma zapaldu duen une bakarra. Elkartearen hitzetan, Muñoz da bere kategorian indartsuen dabilen kirolarietako bat. Atzo -abenduak 8- ere, Elorrioko ziklokrosean aritu zen Hodei Muñoz, eta lehenbiziko postua eskuratu zuen.
Iñigo Urienek ez zuen Kantabrian zorte bera izan, "bigarren zihoan azken itzulian, baina zapatila bat apurtu zitzaion eta ortozik geratu zen". Ondorioz, erretiratu egin behar izan zuen, lokatzarekin ezin zuelako aurrera egin. "Horrelakoak dira lasterketak batzuetan. Espero dugu Iñigo Urienek ere noizbait sariren bat jasotzea, oso denboraldi ona egiten ari baita", erantsi dute elkartetik.
Elorrioko ziklokros txapelketa da modalitate honen zaleen "katedrala". Hala aipatu dute sare sozialetan jarraitzaileek. Hargatik, bertara hurbildu ziren atzo Aiara Txirrindulari Elkarteko kirolariak. Ondorengoak izan ziren eskuratutako emaitzak:
- Asier Beraza: 7. postua
- Iñigo Uria: 8. postua
- Oier Colmenero: 10. postua
- Erlantz Alday: 21. postua
- Iker Colemenero: 24. postua
- Harri Paskier: 32. postua
- Telmo Ibarrola: 49. postua
- Ekhi Uriarte: 50. postua
"Zirkuitua oso astuna izan zen, lokatzagatik asko ibili behar izan ziren oinez, eta bakoitza gogortasunera moldatu behar izan da", azpimarratu du elkarteak.
Oier Colmenero bigarren Urdiainen
Bestalde, Oier Colmenerok Urdiaineko (Nafarroa) Benigmo Mendiaren oroimenezko lasterketan hartu zuen parte asteburuan. "Irteera txarra egin zuen, baina postuak aurreratzen joan zen bigarren bukatu zuen arte, herri horretako Ekain Imaz lasterkariaren atzetik; nabarmen gailendu zena". Hala ere, oso pozik jaso dute emaitza, "aurreko astean erorketa gogorra izan baitzuen" taldeko kideak.
Aiarako Txirrindulari Elkartearen hitzetan, kirolari gutxi lehiatu dira asteburuan, "datozen egunetan presente egongo garen probetarako indarrak gorde behar ditugu eta".