Euskadiko Txapelketak emaitza bikainak utzi ditu gaur Ibaguengo kirol gunean. Izan ere, Hodei Muñoz luiaondoarra, Lukene Trujillano amurrioarra eta Iñaki Carro laudioarra txapeldunak izan dira.
Garaipena lortu duen eskualdeko lehen kirolaria Hodei Muñoz izan da. Aiala Txirrindularitza Elkarteko partaidearentzat 8. aldiz irabazi du aurten eta hasieratik ezarri du bere legea. Hain zuzen, talde guztia kokatu da 10:15ean sarrerako lehen postuetan eta irabazteko asmoarekin atera dira lehen unetik.
Muñozek norgehiagoka izan du tropelaren buruan Haritza Allende bizkaitarrarekin, baina, azkenean, nagusitasunez gailendu da. Horrez gain, podiumetik oso gertu geratu dira Iker Colmenero, Asier Beraza eta Iñigo Uria, 4., 5. eta 6., hurrenez hurren.
Denbora gutxi igaro da eskualdeko hurrengo txapela heldu den arte. Hain zuzen, Lukene Trujillano amurrioarrak Junior kategoriako lehen postua eskuratu du. Lehia polita izan du Naia Agirre bere lagunarekin, eta pozik besarkatu dira helmuga zeharkatu dutenean.
Hirugarren txapelduna Master 30 kategoriak utzi du, Iñaki Carro laudioarra. Master 40 mailan Iñaki Isasi igo da podiumera 3. postuan, David Busto eta Iñaki Yus profesional ohiaren atzetik. Sprintean erabaki da sailkapena Yis eta Isasi artean.
Beste aiaraldear batek ere tokia hartu du oholtzan. Izan ere, Iñaki Guaresti bigarren izan da 23 urtetik azpiko kategorian, Igor Arrietaren ostean. Edonola ere, Guarestiren lasterketa bikaina izan da eta Open diziplinan (hau da, Elite kategoriakoekin batera), 8. izan da. Bere aurrean geratu diren txirrindulari guztiak punta-puntakoak dira: Ion eta Gorka Izagirre, Jonathan Lastra, Aitor Hernandez, Omar Fraile eta Peio Goikoetxea. Aipatzekoa da orpoz orpo ibili dela aiaraldearra eurekin probaren zati handi batean. Sailkapen guztia hemen dago ikusgai.