Aiarako Udalak urtarrilean antolatuko ditu bi lan saio Tokiko 2030 Agendaren Ekintza Plana osatzeko. Oraindik ez du zehaztu noiz izango diren hitzorduak, baina 'Aiara 2030. Eraiki dezagun etorkizuna' egitasmoaren ildoa jarraituko dute. Erakundeak nahi du herritarren iritziak eta ekarpenak jasotzea. Izan ere, adosten diren printzipioak erabakigarriak izango dira ingurumen politikak gidatzeko hurrengo urteetan eta Garapen Iraunkorreko Helburuak bete ahal izateko. Berez, proiektuak Vital Fundazioaren diru-laguntza jaso du.
Gentza Alamillo Aiarako alkateak azaldu duenez, “ekimen honen esparruan, udaleko teknikariak eta politikariak prestatu dira Agenda 2030 eta GIHen arloan, prozesuan parte hartzen duten eragile guztiek horren gaineko ezagutza homogeneoa izan dezaten”.
Gainera, ordezkariak aurreratu du urtarrilaren amaieran gaikuntza eta prestakuntza saio bat antolatzea aurreikusten dutela, "Administrazio Batzarretako ordezkariekin, berriki osatu direnekin”.
Era berean, urteko lehen hilabete honetan, barne mailan, lan teknikoko lehen saioa antolatuko da, eta bertan parte hartuko du `Aiara 2030' prozesuaren talde eragileak, hainbat sektoretako eragileek osatuta dagoena.