Larunbatean 09:00etatik aurrera hasiko da Aiara BTT lasterketa Ibaguengo kirolgunean, Zuhatzan. Iaz bezala, ia 500 kirolarik eman dute izena proban eta Arabako Txapelketa egongo da jokoan. Halaber, Espainiako Txirrindularitza Federazioak antolatzen duen XCM K.5 Txapelketarako puntuagarria izango da ibilbidea.
Edonola ere, ekimenaren helburua ez da soilik txirrindulari federatuen parte hartzea. Horregatik, hainbat irteera ordu egongo dira:
- 09:00etan Arabako Txapelketan eta XCM K.5 Txapelketan aritzen direnak aterako dira
- 09:10ean maratoia egingo duten zikloturisten txanda helduko da
- 09:20an maratoi erdia beteko duten txirrindularien eta bizikleta elektrikoa baliatuko dutenen ordua izango da
Ibilbide luzea 60 kilometrokoa izango da eta 1.900 metroko desnibela proposatuko die kirolariei. Bortaun, Pagonabarra eta Garondo mendien gainak zeharkatuko ditu. Maratoi erdiak, aldiz, 30 kilometroko eta 1.000 metroko desnibela izango du eta Bortaun eta Pagonabarra igaroko ditu.
Antolakuntza lanean aspalditik badago ere, ostiralean mugimendua sumatuko da Etxaurren Ikastolako inguruetan, dortsalak banatzen hasiko baitira 19:00etatik 21:00ak bitartean.