EAEko lehen 'burbuila ostatua' irekiko dute Salmantonen

Azpiegiturak eraikitzen ari dira une honetan. / Sierra Salvada Landetxea

Iñigo Arza laudioarra dago proiektuaren atzean. Bere familiaren landetxeko lurretan garatu du egitasmoa. 

Irailean irekiko ditu ateak Euskal Autonomia Erkidegoko lehen 'burbuila-ostatuak', non eta Salmantonen. Iñigo Arza gazte laudioarrak garatu du proiektua, bere familiaren landetxeko lurretan. Burbuila formako bi azpiegitura ari dira eraikitzen bertan uneotan. “Oinarriak eta estrukturak eginda daude dagoeneko, baina altzariak, lorategiko elementuak eta beste hainbat kontu garrantzitsu falta dira”, azaldu dio Arzak Aiaraldea Komunikabideari.

Hala ere, atzo bertan ireki zuten erreserbak egiteko aukera, landetzearen webgunean. Izan ere, abuztuaren 30ean ireki nahi dute lehen burbuila, eta irailaren amaieran bestea. “Saiatuko gara lehenago egiten, baina ez ditugu eskuak harrapatu nahi”.

‘Sua’ eta ‘Ura’

‘Sua’ eta ‘Ura’ izenak jarri dizkiete bi burbuilei. “Lehenak logela, komuna eta egongela ditu. Bigarrenak, aldiz, ez du egongelarik, baina logela handiagoa da”, zehaztu du Iñigok, “horrez gain, jacuzzia, lorategia eta teleskopio bat ere dute ostatuek. Gorobel eta Ungino ikusten dira bertatik, baina burbuilak ezin dira kanpotik ikusi, bezeroen pribatasuna bermatzeari begira”. 

Arzak kontatu duenez, duela hiru urte ekin zion egitasmoa garatzeari, baina orain arte luzatu da prozesua, “baimen eta tramite kontuengatik batez ere”. 

Beste bezero mota bat

Bezeroa naturatik ahalik eta gertuen egotea da burbuilen xedea, “baina luxuzko zerbitzua bermatuta”. Ildo horretan, Arzak uste du azpiegitura berriek beste bezero mota bat erakarriko dutela landetxera. “Orain arte talde handiak etorri dira, asteburu oso bat edo astebeteko egonaldiak egitera. Burbuilak, aldiz, egun bakarreko esperientziak izango dira seguraski, garestiagoak direlako. Gaitasun ekonomiko ertain-altua duten gazteei bideratuak daude, edo okasio berezi bat ospatu nahi duen orori”. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide