Uda sasoia izanik ere, ez diote bizikletaz ibiltzeari utzi Aiara Txirrindularitza Elkarteko kideek. Eragileak sare sozialetan azaldu duenez, asteburuan Nafarroan izan dira hiru txirrindulari: "Udan ez daude horrenbeste lasterketa, eta ahal denean aritu gara lehiatzen. Alabaina, gazteek ez diote ongi aritzeari utzi: emaitza bikainak lortu zituzten pasa den astean".
Hain zuzen, Peio Albizua, Erlantz Alday eta Oier Colmenero bertaratu ziren Tafallako probara. "Nahiz eta hiru bakarrik izan, hirugarren sailkatu zen Peio, Erlantz bederatzigarren eta Oier hemezortzigarren", zehaztu dute. Hargatik, bigarren geratu ziren taldekako sailkapenean, "emaitza bikaina".
Abuztuan murgilduta, beste zenbait kirol ekimen ditu begitan txirrindularitza elkarteak orain. Batetik, Asturiaseko Candamo herrira joango dira La Cueva de la Peña igoeran parte hartzera, eta bestetik, Arabako Opakuako igoeran ere izango dira aiaraldearrak.
Abuztuak 10eko norgehiagokari dagokionean, "prestigio handikoa" dela nabarmendu du kolektiboak: "Aukera berri bat izango da bestelako txirrindulari batzuk ezagutzeko. 57,4 kilometro gogor izango dira, 1,5 kilometroko portu igoera batekin bukatzeko. Ekhi, Iñigo, Harri, Iker eta Oier izango dira gure kartak".