EH Bilduk eta Aiara Batuz-ek mozioa erregistratu dute eukaliptoen landaketa berriak eragozteko luzamendua ezartzeko. Irizpide hori Hiri Antolamendurako Plan Orokorrean islatu beharko litzateke, behin betiko onartzen denean.
Oposizioko taldeek neurri hori proposatu dute indarrean egon dadin Arabako Foru Aldundiak, basogintzako administrazio eskudunak, eukaliptoaren erabilera lurralde osoan arautuko duen araudia ezarri bitartean.
Eukaliptoaren presentzia 13 aldiz biderkatu da Aiaran azken 10 urteetan
Eukaliptoaren zabalpen kezkagarria
EH Bilduk eta Aiara Batuzek adierazi dute: "Zuhaitz horren hedapen gero eta handiago eta geldiezinak aldaketa handia eragin du Aiaraldeko iparraldeko paisaian, bertan kokatzen baitira egurraren ekoizpen intentsiboko mendiak". Datuekin egiaztatu dituzte hitz horiek; azken 10 urteetan Aiaran bakarrik okupatutako azalera 13 aldiz biderkatu da, 523 hektareatara iritsi arte.
Onura pribatua onura publikoaren kontra
Testua proposatu duten alderdiek ez dute zalantzan jarri eukaliptoek mozkinak sortzeko aukera dutenik, baina azpimarratu dute onura horiek pribatuak direla eta kalteak, adiz, publikoak: biodibertsitatean, paisaian, lurzoruaren emankortasunean, uraren zikloaren erregulazioan eta abarrean eragiten baitute.
Horrez gain, salatu dute: "Eukaliptoaren ustezko karbono-bahiketa ez da hainbestekoa egurraren xedea aztertzen badugu: erabili eta botatzeko papera, eskuoihalak, etab. Bere bizi-zikloak ez du laguntzen klima-aldaketa arintzen".
Bizkaiko eta Gipuzkoako egoerak
Oposizioko alderdiek azaldu dute Bizkaian eta Gipuzkoan neurriak hartu dituztela eukaliptoaren arazoari aurre egiteko: "Bizkaiaren kasuak, 2025eko abenduaren 21era arte debekatuta dago landatzea, aldi horretan landaketak antolatu arte. Gipuzkoaren kasuan, baso-espezie guztiak mozteko debekua ezarri da, landatzen direnetik 25 urte igaro arte".