Otueta Gizarte Etxeko tabernaren kudeaketa enkantera atera du Luiaondoko Administrazio Batzarrak. Interesdunek azaroaren 24ra arte izango dute eskaintzak aurkezteko epea, Aiarako Udaletxean bertan.
Hiru gutunazabal aurkeztu beharko dira guztira. Lehenegoan eskaintza ekonomikoari lotutako informazioa sartu beharko da, bigarrenean tabernari buruzko proposamen teknikoa eta hirugarrean dokumentazio administratiboa. Pleguak udaletxera deituz edo j.a.luiaondo@gmail.com helbide elektronikora mezua bidaliz eskuratu daitezke.
Tabernaren ustiapenagatik ordaintzea planteatzen den zenbatekoa izango da gehien baloratuko dena esleipena egiterako orduan. Planteamendu teknikoak ere puntu ugari jasoko ditu baina, horrez gain, positiboki baloratuko da baita ere tabernaren kudeatzailea edo kontratatuko diren langileak Luiaondokoak izatea.
Egunero irekita
Hainbat baldintza bete beharko ditu establezimenduaren kudeatzaileak. Taberna irailaren 1etik uztailaren 31era egon beharko da irekita, astelehenetik ostiralera. Lanegunetan 15:00etatik 22:00etara egon beharko da zabalik. Asteburu eta jaiegunetan, aldiz, 10:00etatik 23:00etara eskaini beharko du zerbitzua.
Hala ere, administrazio batzarrak zehaztu du hori "gutxieneko ordutegia" izango dela, eta lehiaketara aurkezten diren pertsonek aukera izango dutela eskaintza zabalagoa egiteko. Hori bai, gero hori bete beharko dute hautatuak izaten badira.
Prezioak tabernaren kudeatzaileak ezarriko ditu urtero, eta espazioko toki batean egon beharko dira ikusgai.
Horrez gain, erabilera anitzeko aretoa, frontoia eta bolatokia ireki eta ixteaz ere arduratu beharko da tabernaria.