Aiarako Udalak gogoratu du azaroaren 13an amaituko dela Administrazio Batzarrei zuzendutako Dirulaguntzen Programaren deialdia. Egitasmo hau bi ildotan banatzen da eta bakoitzak 35.000 euroko aurrekontua dauka.
Alde batetik, lanen kostuari aurre egiteko ematen diote dirua batzarrei. Bestetik, obra horiek behar dituzten kontratazio teknikoak babesten ditu programak. Ezinbesteko baldintzak dira urte bakoitzeko proiektu bakarra aurkeztea eta 2022an egikaritzea. Kontzeju bakoitzak 6.000 euro jasoko ditu gehien jota.
Lanen izaerari dagokionez, oinarrizko azpiegiturako obrak finantzatuko dira: argiteria publikoaren sare orokorra eta energia elektrikoaren sareak edo edateko uraren etxez etxeko banaketa-sareak (behe-sarea eta alta-sarea) instalatzea, berritzea edo handitzea eta konpontzea. Mota horretako sareen erabateko berritzea eskatzen denean, azpiegiturek 20 urteko edo gehiagoko antzinatasuna izan beharko dute.
Era berean, hondakin-urak saneatzeko eta arazteko sare orokorren eta/edo sistemen eta euri-urak bereizteko sareen kasuan, mota horretako sareak erabat berritu behar direnean, 20 urteko edo gehiagoko antzinatasuna izan beharko dute. Hiri-eremu finkatuetan bide publikoen zoladura ere diruz lagundu ahal izango da.
Halaber, deialdian parte har dezakete landa- eta abeltzaintza-bideetako obrek (basogintzakoak izan ezik), betiere titulartasun publikokoak badira. Bizileku iraunkorra duen biztanlerik ez duten herriguneetan egin nahi diren lanak ere aurkeztu ahalko dira.
Gentza Alamillo alkateak honakoa erantsi du: “Ekipamendu- eta zerbitzu-obrei dagokienez, dirulaguntza jaso ahal izango dute kontzeju-gelak, erabilera publikorako biltegiak, gizarte-zentroak (erabilera anitzeko aretoak), bolatokiak, estali gabeko frontoiak, parkeak eta lorategiak eraikitzeak, handitzeak, birgaitzeak, konpontzeak edo aldatzeak, bai eta kanpoko kirol-pistak aldatzeak ere, besteak beste”.
Laguntza teknikoen kasuan, proiektuak idazteko, obrak zuzentzeko eta obrak gauzatzeko zuzendaritzetarako ordainsari teknikoen %50 lagunduko dute diruz. Halaber, segurtasun- eta osasun-azterlanak idaztea eta obretako segurtasuna eta osasuna koordinatzea, bai eta balioetsitako memoriak ere aurkeztu ahalko dira diru-laguntzetara. Era berean, aurkeztu daitezke obra egiteko behar diren txosten teknikoak, hala nola txosten geoteknikoak, hondakinen kudeaketakoak, lan topografikoak edo proiektu bat idazteko edo obra bat gauzatzeko behar den beste edozein.