Brindisa egin dute eguerdian Arespalditzako Soloitza Gaztandegian, Enoturismoaren Nazioarteko Eguna dela baliatuz Txakoli Biziren bigarren edizioa aurkezteko.
Gaurtik hasita hilaren 27ra bitarte hainbat ekintza antolatu dituzte eskualdean bertoko kultura eta zaporeak zabaldu asmoz. Besteak beste, dastatze eta sukaldaritza erakustaldiak egongo dira egun eta leku ezberdinetan, eta musikak eta bakarrizketek ere tokia izango dute programazioan.
Aurkezpenean Aiarako Kuadrillako Presidente Encina Castresana "poz-pozik" agertu da ekimena bigarrenez ospatu ahal izateagatik. "Gure eskualdea sustatzeko, eta aldi berean eremuko produktuak barreiatzeko modu bat da, jarduerak eta esperientzia enogastronomikoak direla medio".
Aurkezpenean Eduardo Eguinaco Arabako Nekazaritza Saileko foru diputatua, Irma Basterra Arabako Lurralde Orekaren Saileko diputatua eta Daniel Sonala Basque Tourreko zuzendaria ere izan dira, Airaldea eskualdeko alkateez lagunduta. Bertaratutakoek brindisa egin dute eta Soloitza Gaztandegiko produktuak dastatzeko aukera izan dute, bisita gidatu eta guzti.
Txakoli Biziren inguruko programazioa aiaraldea.org webgunean ikusi daiteke. Halaber, jardueretan izena emateko aukera dago bertan. Txakoli Bizik Arabako Foru Aldundiaren eta Eusko Jaurlaritzaren laguntza ekonomikoa du.