Eskolarteko ziklokrosaren ostean, heldu eta gazteentzako Aiarako Ziklokrosa lehiatu zen atzo Ibaguenen. Eguraldia lagun, ehunka kirolari eta kirolzale bertaratu ziren zirkuitua betetzera.
Lasterketak Arabako Ziklokros Txapelketako lau txapel utzi zituen; Iker Colmenero, Lukene Trujillano, Gaizka Pujana eta David Hidalgo txirrindularientzat, hain zuzen.
Edonola ere, Arabatik kanpoko parte hartzaileak ere egon ziren lehian eta, hori dela medio, soilik Iker Colmenerok irabazi zuen bere kategoriako -kadete- lasterketa. Nesken kadeteen artean Mirari Gotxi laugarren izan zen sailkapen orokorrean eta bigarren Araban. Hurrengoa Araban Lierni Aldaiturriaga izan zen.
Master 40 kategorian Gaizka Pujanak ezin izan zuen iazko marka errepikatu, eta nahiz eta lasterketa buruan egon zenbait kilometrotan, azkenean bigarren zeharkatu zuen helmuga. Hala ere, Arabako Txapelduna izan zen. Javi Santos egon zen berarekin podiumean, hirugarren sailkatu baitzen lurralde historiko berekoen artean.
Lukene Trujillano Elite Sub-23ko hirugarren izan zen sailkapen orokorrean, baina hori ez zen arazoa izan Arabako onena izatea lortzeko. Ixone Nuñez ere igo zen podium horretara, hirugarren postuan.
Azkenik, Master 30 kategorian tokiko nagusitasuna egon zen. David Hidalgo bigarren sartu zen helmugan eta Arabako txapela eraman zuen. Iñaki Carro, iazko irabazlea, hirugarren izan zen sailkapen orokorrean eta bigarren Araban, bere atzetik Araban Andoni Etxebarri eta Alex Hidalgo egon ziren, hirugarren eta laugarren, hurrenez hurren.