Aiarako Udalak %30ean handitu zuen iaz bazka siloratzeko plastikoen bilketa kopurua, 2021eko datuekin alderatuta. Aiarako alkate Gentza Alamillok azaldu duenez, “2022an nekazaritzako 37 tona plastiko bildu ziren 74 ustiategitan, guztiak Aiarako udalerrian”.
Hondakin horiek biltzen dituen zerbitzua tokiko erakundearen egitasmoa da, erabat doakoa. Zaku gardenak erabilita, plastikoak euren izaeraren arabera sailkatzen dira, baita soketatik bereizi ere, ondoren ustiategietan bertan jasotzeko.
Doako baliabide horrekin, helburu bikoitza du Aiarako Udalak: murriztea lehen sektorean sortzen diren hondakinak eta ingurumena babestea. Ez da horretarako eskaintzen den bitarteko bakarra, Alamillok gogoratu duenez: “ustiategietan sortutako beste hondakin batzuk kudeatzeko, Arabako Foru Aldundiaren puntu berde mugikorra dago. Guztira, urtean lau hondakin mota biltzen ditu Aiarako Administrazio Batzar bakoitzean, eta iragazkiak, olio minerala, fitosanitarioen ontziak eta etxeko beste hondakin batzuk (pilak, pintura-poteak, etxetresna elektriko txikiak, etab.) uzteko balio du”.