Igande honetan, otsailaren 5ean, korrikalariz beteko dira Etxaurren Ikastolaren inguruko zelaiak. Hogeitahamabigarrenez antolatuko du guraso elkarteak eskola kiroleko proba eta zazpigarrenez, aldiz, herri lasterketa. Adinaren arabera maila eta zirkuitu desberdinetan arituko dira korrikalariak.
Kirol jardunaldia 11:00etan hasiko da eskola kiroleko lehiakide nagusienekin. Ibaguen Kirolguneko larreetan korrika egiten lehenak koskorrak izango dira eta 2200 metroko ibilbideari egin beharko diote aurre.
Jarraian kumeen txanda izango da, 1.800 metrorekin, eta azkenak ‘eskola’ edo ‘benjamin’ kategoriakoak izango izango dira. Hauek 1.300 metroko zirkuitua osatuko dute.
Eguerdian txikienen txanda helduko da: 12:25ean 400 metroko lasterketa egingo dute Sisi eta Gartzu ikastolako panpinekin.
Lasterketa honetan eskola kirolean ez dauden Aiarako haur guztiek har dezakete parte, ikastolakoak izan zein ez.
Egunari amaiera emateko VII Herri Lasterketa prestatu dute Etxaurren ikastolako gurasoek. Helduen txanda izango da eta 12:40ean ekingo diote 3.600 metroko ibilbideari. Proba guztietako izen emateak egunean bertan egin beharko dira, 10:00etatik aurrera.
