Euskarazko bi jarduera hartuko ditu asteburu honetan Aiarak. Gaur bertan, ostiralean, euskarazko zazpi film labur proiektatuko dituzte, Laburbira zikloaren barruan. Igandean, martxoaren 26an, ipuinak, eskulanak, eta askaria egingo dituzte, Igande Arratsaldeak Familian egitasmoaren barruan.
Euskaltzaleen Topaguneak antolatzen duen euskarazko film laburren zirkuitu ibiltaria da Laburbira eta aurten zazpi film laburrez osatutako bilduma eskaintzen ari da. Gaur arratsaldean, 19:00etatik Aurrera, aiararrek film hauek ikusteko aukera izango dute: Muskil, Olatuen isiltasuna, Asko falta da?, Irrits, Erlojupekoa, Hitzak eta Kuadro goriari heldu euskarazko filmak proiektatuko dituzte.
Igande Arratsaldeak Familian ekimena, aldz, Aiarako Udalak eta Hogeitalau Euskara Elkarteak antolatzen dute. Igande honetan, martxoaren 26an, ipuinak, eskulanak eta askaria prestatuko dituzte Arespalditzan. ‘Ipuinetatik jabekuntzarantz’ jarri diote izena ekimenari. Itziar Saenz de Ojerrek Pituxa ipuin kontaketa saioa egingo du. "Neska eta mutilen eskubide berdintasuna eta hezkidetza bultzatzen dituzten baloreak oinarri hartzen dituzten ipuin eta kontuez osatutako ipuin kontaketa saioa" da eta 45 minutuko iraupena du.