Atzo zabaldu zuen Aiarako EH Bilduk bere hautagaien zerrenda udal hauteskundeetarako. Pruden Otegi izango da koalizioaren alkategaia maiatzaren 28rako.
Luaiondokoa da Otegi, eta hainbat urtez tailerra izan zuen herrian, baina jadanik erretiratua dago. Egungo Administrazio Batzarreko kidea izan ez ezik, bi aldiz izan da zinegotzi ere Aiaran, Herri Batasunarekin eta Euskal Herritarrokekin.
Bere helburu nagusiei buruz galdetu dio Aiaraldea Komunikabideak eta Otegik erantzun dio, lehenik eta behin, "udal jarduera kalera atera behar dela, herritarrek ez baitakite zer gertatzen den erakundean". Horrez gain, aipatu du Aiarako 24 herrien arteko koordinazioa hobetu beharra dagoela.
Zerrendako bigarren tokia Karmele Poblacionek hartu du, hau da, duela lau urteko alkategaiak. Hirugarren postuan Iñigo Fraile dago, laugarrenean Marian Mendiguren egungo zinegotzia eta bosgarrenean Amaiur Mendioroz. Seigarrena Eneko Toquero da eta zazpigarrena Reyes Garcia. Lauren Uria da hurrengoa eta gero Nekane Santamaria eta Josu Artetxe daude eta Inma Gartziak ixten du zerrenda.
Ordezkoak Asier Pikaza, Nerea Goti eta Jose Angel Biguri izango dira.
