Arabako Foru Aldundiak jakinarazi du 1,5 milioi euro baino gehiago erabiliko dituela bigarren mailako errepideen zorua hobetzeko. Horretarako, lehen kontratu esleipena egin du, 965.774 eurokoa.
Horren bitartez, Arabako 23 errepidetan konponketak eta tratamenduak egingo dituzte, lurra hartxintxarrez garaztatuz.
23 bide horietatik, bost dira Aiarakoak: tokiko sarean sailkatutako A-3630 Retes-Erbi errepidea eta auzobide sarearen barnean dauden A-4602 Lezamarako sarbidea, A-4619 Izoriarako sarbidea, A-4614 Agiñagarako sarbidea, eta A-4622 Lexartzurako sarbidea.
Esleitutako kontratuak bi hilabete eta erdiko exekuzio epea du eta Aldundiak ohartarazi duenaren arabera, aurten zabalduko ditu toki eta auzo sareetako ekintza horiek kontratu berriekin, “guztira 1,5 milioi euro baino gehiagoko zenbatekoa gainditzeraino”.
Izan ere, foru erakundeak adierazi du narriadurak epe laburrean konpondu behar direla “larriagotu ez daitezen eta eraginik izan ez dezaten bide segurtasunean”. Hori dela-eta, pitzadurak, zuloak eta deformazioak dituzten foru sareko errepideak konponduko dituzte.