Harrera bikaina izan zuen atzo Babion eskainitako bisita gidatuak, Jon Obaldia Aranzadi Zientzia Elkarteko kide izoriarrak Aiaraldea Komunikabideari azaldu dionez. Babion egiten ari diren indusketen helburuak eta emaitzak azaldu zituzten txangoan.
Izan ere, kokapen horretan dagoen herrixka Lehen Burdin Harokoa da eta zientzialariak gordetzen dituen sekretuak azaleratzen saiatzen ari dira. Orain arte lortutako informazioak iradokitzen du herri harresitua Kristo Aurreko VIII. mendetik V. mendera luzatu zela.
Han bizi zen komunitateak nekazaritza eta abeltzaintza erabiltzen zituen bizirauteko eta defentsa sistema sofistikatua zuen beste komunitateen mehatxuei aurre egiteko.
Berez, gizarte gerlaria ere bazen eta guda euren egunerokotasunean zegoen txertatuta. Horregatik, babes elementu naturalak baliatzen zituzten eta harrizko hesiak gehitu zizkieten.
Hain zuzen, Aranzadi saiatzen ari da defentsa sistema horren funtzionamendua ikertzen eta argitzen. Horrez gain, badaude bestelako misterioak, adibidez, nola hornitzen ziren urez.
"Harrera izugarria"
Jon Obaldiak aipatu du Izoriako elizan hainbat herritar jaso zituztela atzo 11:00etan mendi tontorrera igotzeko eta Babion ia 100 lagun elkartu zirela 11:30ean bisita hasi zenean.
Egitasmoak oso harrera ona izan zuen eta amaieran Izoriako Administrazio Batzarrak askaria eskaini zuen, ekimena borobiltzeko.
Argazkiak: Josu Zaldibar (Blackkamera)