Etxaurren Ikastolako Guraso Elkarteko lehendakaria, eskolako zuzendaria eta Aiarako alkateordea Lakuan izan ziren atzo, irailak 14, Eusko Jaurlaritzako eskola-garraioko eta Arabako Hezkuntzako arduradunarekin bilduta.
Bertan esan zieten “ezinezkoa” dela “arazoa egun batean konpontzea”. Izan ere, Jaurlaritzak uda osoa omen darama enpresekin negoziazioetan eta, lizitazioen pleguak hiru aldiz berregin eta iaz prezioa nabarmen igo bazen ere, Arabako eta Bizkaiko enpresak ez dira aurkeztu. Jaurlaritzak azpimarratu du “garraio-zerbitzuaren benetako kostuaren oso gainetik” ordaintzen direla kontratuak eta, hala ere, lizitazioak hutsik geratu direla.
Orain Eusko Jaurlaritza beste herrialde batzuetako enpresekin eta enpresa txikiekin hitz egiten ari da, baina, bileran komentatu zutenaren arabera, enpresa handiak presioa egiten ari omen dira, gainerakoek kontratuak onar ez ditzaten. Gainera, gobernuak “borondate falta” egozten die enpresei, gaur gaurkoz, zerbitzua ematera behartuta daudelako.
Egoera luzatzen ari da
Blokeo egoera horretan ez du ematen irtenbidea aurki helduko denik, eta hainbat eskola publikotako familiek (Mendiko eskolan hamar familia kaltetu ere daude) astebete baino gehiago daramate arazoarekin. Egoeraren lehen kaltetuak haiek direla azpimarratu dute, eta ez Eusko Jaurlaritza, honek atzo aipatu zien bezala. Era berean, ondorio latzenak familia zaurgarriek pairatzen dituztela azpimarratu dute, autorik ez dutenak, zehazki.
Gainera, albo-kaltetuak ere badaude, dagoeneko garraio-zerbitzurik ez duten Batxilergoko eta Lanbide Heziketako ikasleak, hain zuzen ere. Horiek lekurik gabe geratzen ari dira autobus publikoan, DBHko ikasleek aurreko geralekuetan betetzen baitute eta, gainera, aurreko ikasturtean baino autobus txikiagoa igarotzen baita orain.
Horiek horrela, egoera luzatzen den bitartean mobilizatzen jarraituko dutela adierazi dute Guraso Elkarteko kideek. Gaur bertan auto-karabana deitu du Aiaraldeko Hezkuntza Publikoa Bizirik plataformak. 17:00etan abiatuko da Urduñatik eta eskualdeko herri guztietatik igaroko da.
Horrez gain, adierazi dute harremanetan daudela Araban antzeko egoera duten beste ikastetxeekin. Gaur ere, 18:00etan elkarretaratzea egingo dute Gasteizko Andre Maria Zuriaren plazan.
Garraiorik gabe, arazoak jantokietan, matrikulazio mugimenduak...aski da!!! pic.twitter.com/AOZEB3LQ9b
— Amurrioko Hezkuntza Publikoaren Sarea (@ahpsarea) September 14, 2023