Aiala Txirrindularitza Elkarteak denboraldi bikaina lortu du errepidean eta ziklokrosean lehiatzeari ekin dio jadanik.
Berez, Arabako Sarien banaketan islatu zen aiararren nagusitasuna. Talderik onena izateaz gain, Iker Colmenero txirrindulari onena izendatu zuten eta Ekhi Uriarte, aldiz, bigarren. Halaber, Ion Egia lehen urteko kadeterik onena izendatu zuten. Sariak Ekhi Uriarteri eskaini zizkioten bere tadekideek, egun batzuk lehenago istripua izan baitzuen Murgian eta ospitaleratu behar izan zuten.
Ziklokros denboraldia
Aitortza horiek bildu ostean, Aiala Txirrindularitza Elkartea buru-belarri dabil ziklokrosean eta, zehazki, Espainiako Kopan eman du izena. Taldeko kideak Xixonen egon ziren urriaren 1ean eta Mirari Gotxik 5. postua eskuratu zuen.
Larunbatean, aldiz, Pontevedrako proban 7. amaitu zuten Gotxik eta Egiak eta hurrengo egunean Gotxik podiuma zapaldu zuen Marinen, hirugarren postua erdietsita.
Ibai Colmenerok, bere aldetik, El Escorialeko XII. Sari Nagusian parte hartu zuen eta 8. sailkatu zen.