Udan bukatu zituzten Etxegoien eta Amurrio arteko errepidea konpontzeko obrak. 177.880,62 euroko inbertsioa ekarri dute lanek eta 163.738,33 eurorekin finantzatu du Arabako Foru Aldundiak. Gainerako gastua Etxegoien eta Amurrio artean banatu dute.
Bidearen 850 metro berritu dituzte orotara, horietako 168 metro Etxegoiengoak dira eta gainerakoak Amurriokoak.
Etxegoienek kudeatu du Amurrioko errepidearen konponketa
Berez, lanak gauzatzea ingeniaritza juridiko eta ekonomikoaren ondorioa izan da. Izan ere, konpondutako azalera gehiena Amurriokoa da, baina Etxegoiengo Administrazio Batzarraren bidez egin da. Kontzejuak lortu du dirua eta Arabako Foru Aldundiarekin kudeatu du.
"Lau urte behar izan ditugu hau burutzeko", azaldu dio Javi Aspuru Etxegoiengo herritarrak Aiaraldea Komunikabideari.
Amurriok Etxegoieni "kendutako" bidea
Etxegoienek obra hau bere gain hartu izanak bi azalpen ditu. Alde batetik, aiararrek erabiltzen dute, ez baitago beste modurik autoz ateratzeko administrazio batzarretik.
Bestetik, iraganean errepide hori Etxegoiengoa zen. Horrela adierazi du Aspuruk: "Duela 25 urte beste konponketa bat egin zen eta guk egin genuen. Ordea, XXI. mendeko lehen hamarkadan Amurrioko Udalak proiektua garatu zuen eraztun berde handia egiteko eta epaiketa bidez kendu zigun errepidea".
Prozedura konplexua
Gauzak horrela, eta errepidearen zati gehiena berea ez denez, azpiegitura hori lagatzea eskatu zion Etxegoienek Amurrioko Udalari. Lagapen hitzarmena 17 urtekoa da, gutxienez 15 urtekoa izatea exijitzen baitu Foru planak.
Urrats hori eginda, Etxegoienek dirulaguntza eskatu zuen 2022-2023 Foru Planean eta Arabako Foru Aldundiak baimendu zuen finantziazioa.
"Lan nekeza izan da. 12 aldiz bildu behar izan dugu kontzejua eta lau urtez luzatu da prozesua, baina aintzat hartu behar da Foru Plana beharrezkoa zela finantzatzeko eta Amurriok bestelako premiak eta lehentasunak dituela", argitu du Aspuruk.