Oihan Mimenza Goikoetxea pozik itzuli da Galiziatik eta modu positiboan baloratu du bere egonaldia Euskal Selekzioan. Espainiako 14 urtetik azpiko Selekzioen Txapelketan aritu da eta lehenengo aldiz hautatua izan da deialdi ofizialean. Bere senideek adierazi dutenez, ondo abiatu du bere ibilbidea taldean.
Athletic Clubeko jokalaria ez da hasierako hamaikakoan egon, baina izan dituen minutuak ondo baliatu ditu. Hain zuzen, larunbatean Asturiaseko Selekzioaren kontra 60. minutuan atera zen futbol zelaira eta bi gol egin zituen. 5-1 irabazi zuten.
Atzo, igandean, 60. minutuan ere sartu zen zelaian eta bere taldea 3-1 gailendu zen Galiziaren kontra.
Bere familiako kideek Aiaraldea Komunikabideari azaldu diotenez, Luiaondoarra pozik dago ez bakarrik golak sartzeagatik, baita jokatu duelako eta bere taldekideak hobeto ezagutzeko parada izan duelako.
Oro har, esperientzia polita izan da aiararrarentzat eta, horrez gain, larunbatean Balaidos futbol estadioan egon ziren Celta de Vigo eta Sevilla FC taldeen arteko partida ikusten.