Aiarako EAJk mozioa eramango du hilabete honetako Udal Osoko Bilkurara eta testu horretan eskatuko die alderdi eta hauteskunde plataformei euren hauteskunde zerrendetan indarkeria matxistagatik inputaturik ez izateko.
Zehazki, dokumentuak honakoa adierazten du:
- Aiarako Udalean ordezkaritza duten alderdien eta hauteskunde-plataformen hauteskunde-batzordeei eta zuzendaritza-organoei eskatzea, azken batean, berrets ditzatela Aiarako udalerrirako hauteskunde-zerrendak zerrenda horietan ez sartzeko, inola ere, indarkeria matxistaren delituagatik inputatutako inor, eta, inputazioa sartu ondorengoa bada, zerrenda horietatik eta hauteskunde-kanpainetatik baztertzeko.
- Erabaki honen berri ematea Aiarako Udalean ordezkaritza duten alderdien eta hauteskunde-plataformen zuzendaritzei.
Jeltzaleek azaldu dute zergatik sortu duten proposamena: "Aiaran aurkeztutako hauteskunde-zerrendetako batean, indarkeria matxistagatik inputatutako hautagai bat zegoen, eta, gainera, hauteskunde-kanpaina aktiboki egin zuen, argazkietan eta hauteskunde-ekitaldietan agertuta".
EAJren ustez, "egoera horrek haserrea eta atsekabea eragin zituen herritarrengan, indarkeria matxistagatiko inputazioaren aurrean zigorgabetasuna eta indarkeria matxistaren aurkako eta berdintasunaren aldeko borrokan atzera egitea bezala ulertu baitzen".
Beste talde politikoen iritzia
Mozioaren harira, Aiara Batuzek azaldu du ez duela adierazpenik egingo eta mozioan agertzen den eskaeraren alde bozkatuko duela.
EH Bilduk, bere aldetik, iragarri du testuaren alde bozkatuko dutela, baina ñabardura gehitu dute: "Ondo dago indarkeriarem aurrean jarrera irmoak eskatzea baina ez genuke hain larria den gai hori alderkerietan ibiltzeko baliatu behar".
Horrela, koalizioak honakoa argudiatu du: "Argi dago guretzat biolentzia matxista marra gorria dela eta portaera horren zantzuak daudenean, pertsona horren egileari dimititzeko eskatzen zaiola. Holan azalduko dugu Udalbatzan aurkeztuko den dokumentu batean. EAJk aurkeztu duen mozioan, ordea, badirudi asmoa tratu txarrak errefusatzearekin batera udaleko talde batekin duten haserre politikoa nahastu egin dutela. Guk ez dugu asmorik borroka horretan sartzeko. Gure jarrera biolentzia matxistaren uko oso argia da eta estrategia politikoak eremu horretatik kanpo geratu behar dira. EH Bilduk bere tresna propioak ditu marra hori gainditzen duen oro koaliziotik kanpo gera dadin, ezaguna denez".