Aiarako udalbatzak mozioa onartu zuen pasa den astean, Arabako Foru Aldundiari eskatzeko bertan behera uztea eukalipto landaketak. Zehazki, tokiko erakundeak eskatu dio Aldundiari espezie horren erabilera arautzea eta mugatzea.
Izan ere, "Aiarako kasuan, eukaliptoak azken hamar urteotan okupatutako azalera 13 aldiz biderkatu da, 523 hektareara iritsiz. Euskal Herriko Unibertsitateak eta Aranzadi elkarteak egindako txosten baten arabera, eukaliptoaren sail handiek biodibertsitatearen galera larria ekartzen dute mendien malda handiengatik higadura prozesua larriak eta errekastoak eta ibaiadarrak lehortzea ekartzen dutelako", adierazi dute.
Hain zuzen, EH Bilduk eta Aiara Batuzek aipatu dute pinuen gaixotasuna dela eta, baso-jabetza kontzentratzen duten inbertitzaileek eukaliptoaren aldeko apustua egin dutela, itzulera ekonomiko azkarrak lortzeko.
Horrela, Aiarako Udalak iradoki dio Arabako Foru Aldundiari inguruko adibideak jarraitzea: "Bizkaiak 2026ra arte landatzea debekatu du eta Gipuzkoan baso-espezie guztiak moztea debekatu da, landatzen direnetik 25 urte igaro arte".
EAJren abstentzioa
EH Bilduk eta Aiara Batuzek alde bozkatu bazuten ere, EAJk nahiago izan zuen abstenitzea bi arrazoirengatik. Hala azaldu du Gentza Alamillo bozeramaile jeltzaleak: "Alde batetik, gai hau jorratzen ari dira orain Aldundian, eta uste dugu lan hori errespetatu behar dugula. Bestetik, aurreko legealdian bi taldeek mozio bera aurkeztu zuten, baina Udalari exijituta eukaliptoen landaketa etetea, eredugarriak izateko. Aurreko legealdian esan genien tokiko erakundeak ez duela eskumenik hori arautzeko, eta ez dugu ulertzen orain, eurek kudeatzen dutenean tokiko erakundea, mozio bera proposatzea Arabako Foru Aldundiari begira".