Aiarako EAJk prentsa oharra zabaldu du salatzeko, bere ustez, EH Bilduk eta Aiara Batuzek osatzen duten Udal Gobernu Taldeak ez duela erakundearen jardueraren berri ematen.
Zehazki, jeltzaleek azaldu dute joan den uztailean onartutako udal-aurrekontuak, 2023ko hiruhileko fakturen erregistroa eta udalbatzen aktak ez direla argitaratu udal webgunean.
Gentza Alamillo EAJko bozeramaileak adierazi du horrek zailtzen duela herritarrei kontuak ematea eta gardentasun falta dagoela.
Horren aurrean, jeltzaleek argudiatu dute "EAJ-PNVko aurreko alkate Gentza Alamilloren kudeaketan, 2015etik 2022ra bitarteko udal aurrekontu guztiak eskuragarri egon direla eta daudela Udalaren webgunean, gardentasunarekiko eta informaziorako sarbidearekiko etengabeko konpromisoa erakutsiz".
Hori dela eta, Alamillok honakoa esan du: "EAJ-PNVren Udal Taldeak behin eta berriz eskatzen dio egungo Gobernuari gardentasunarekin duen konpromisoa berriz aztertzeko eta berehalako neurriak hartzeko, Aiarako herritarrek beren ongizateari zuzenean eragiten dioten gaiei buruz informatuta egoteko duten oinarrizko eskubidea bermatzeko".