Harsco multinazioanalak obrak abiatu ditu Murgan lantegi berria eraikitzeko. Kider enpresak okupatzen zuen lursaila eskuratu du konpainiak eta bi ekoizpen prozesu egingo ditu bertan. Alde batetik, altzairutegien hondakinak birziklatzea eta, bestetik, horiekin ekoasfaltoa produzitzea, zeinak karbono aztarna txikiagoa duen.
Harscoren aurreikuspenak dira 195.000 tona tratatzea urtero eta hedabideetan azaldu dutenez, harreman estua dute inguruko altzairutegiekin (Sidenor, Arcelor Mittal...). Berez, altzairua ekoizteko hornitzen ditu multinazionalak enpresa horiek eta orain produktu horrek sortzen dituen hondakinen %95a berreskuratzea du helburu.
Harscok urrian eskuratu zuen baimena lanak hasteko eta urtarrilaren 8an ekin zion obrak egiteari. Bere ideia da udan bertan irekitzea fabrika berria.
Eusko Jaurlaritzaren bultzada
Egitasmoa lotuta dago Eusko Jaurlaritzak sustatutako hainbat proiekturi, ekonomia zirkularra bultzatzeko Hondakinen Prebentzio eta Kudeaketarako Euskadi 2030 Planaren barruan. Garapen Ekonomiko, Jasangarritasun eta Ingurumen Saila 11 proiekturen atzean egon da hondakinak balorizatzeko eta 31,2 milioi euroko dirulaguntzak banatu ditu jadanik.
Harsco enpresa estatubatuarrak 32 herrialdetan funtzionatzen du eta altzairuaren ekoizpenerako osagaien munduko hornitzaile handienetakoa da.