Arespalditzako Soloitza gaztandegia Euskal Esnekigileen Elkarteko kide izango da aurrerantzean. Elkartea 2023an sortu zuten bost ekoizleren ekimenari esker. Gaur gaurkoz 29 esnekigilek osatzen dute hau, eta guztien artean ehundik gora esneki produktu ekoizten dituzte. Elkarteak sektorea indartzea eta gizartearen esnekien interesa sustatzea du helburu.
Euskal Herriko esnekien aberastasuna aldarrikatu eta zaindu nahi ditu elkarteak, "lurraldean ondo errotutako sektore bat" indartuz. Elkartearen jaiotza mugarria dela adierazi dute: "Elkarte aitzindaria da, hiru abeltzaintza-espezieen esneki eta esne mota guztiak ekoizten eta eraldatzen lan egiten duten euskal profesionalak elkartzen baititu lehen aldiz".
Elkartearen helburuak
"Sektorearen eta bertakoaren alde eginiko lana ezagutzera ematea, dibertsifikazioa ardatz eta indargune izanik", horrela adierazi dute Euskal Esnekigileen Elkarteko kideek hasi berri den urterako markatutako helburua.
Ekoizleak eta kontsumitzaileak hurbildu nahi dituzte, ,ekoizle guztien lana desberdina izanda ere ere, erakunde eta kontsumitzaileen aurrean batasuna adierazten.
Halaber, sektoreko profesionalen interesak, beste alor batzuetan ere defendatzeko bokazioa adierazi du elkarteak: "Profesionalen interesak ordezkatuko eta gauzatuko ditugu administrazioaren aurrean eta osasun-agintaritza eskudunekin koordinatzeko bitartekaritza eskainiko dugu. Kolektiboaren prestakuntza beharrak kudeatzeko plataforma gisa funtzionatuko dugu, elkartekideen garapen tekniko zein enpresarialerako baldintzak hobetzeko lan eginez".
Elkarteko ateak "zabalik daudela" azaldu dute, interesa izan dezaketen Euskal Herriko gainontzeko esne ekoizleentzako. Elkarteari buruzko informazio guztia Interneteko web orrian plazaratu dute.
Soloitza gaztandegia
Arespalditzan dago kokatuta Soloitza gaztandegia, eta 2020an ekin zion ibilbideari. Behi esnearekin ekoizten dituzte produktuak; jogurtak, gazta freskoak eta gazta urdinak nagusiki. Hain zuzen ere, bertan ekoiztutako Eskutxi gazta urdinak lehenengo saria jaso zuen 2022an Tolosan egindako Euskal Herriko Gazta eta Esnekien Txapelketan.