“Zerbitzuak pribatizatzen” ari da EH Bildu eta Aiara Batuzek osatutako Udal Gobernua, EAJren ustetan. Zehazki, “sare sozialetako profil instituzionalak kudeatzeko eta udalaren web-orrirako edukiak sortzeko” kontratu bat ateratzea leporatu diote jeltzaleek Udalari.
Gentza Alamilloren aburuz, “udal zerbitzuen eta informazioaren pribatizazio argia” da hori, eta “enpresa lagunei mesede egiteko helburuarekin” egin da.
“Orain arte, udal teknikariek eta udal batzordeetako lehendakariek kudeatzen zuten Udalaren profila Facebooken”, azaldu du bozeramaile jeltzaleak. Bere ustez, "erabat tamalgarria” da EH Bildu “pribatizazio joera hori sustatzen aritzea” Aiaraldean gobernatzen dituen herrietan, “zerbitzu publikoak udalerriarekin konprometitutako langile kualifikatuen esku mantendu beharrean".
Alamilloren hitzetan, “funtsezkoa” da sare sozialen kudeaketa eta udal webgunerako edukiak sortzea, “herritarrekiko komunikazio eraginkorra eta gardena bermatzeko”. Horri lotuta, alkate ohiak nabarmendu du sistema horrek “ezin hobeto” funtzionatu duela aurreko legealdietan, “agintaldi honetako lehen urtea barne”.
Gauzak hala, “pribatizazio-erabaki hori berriz aztertzea” eskatu diote EAJko kideek Udal Gobernuari, “baliabide publikoen erabilera eraginkorrari lehentasuna emateko”.