Aurten ez dira egongo Erretes Lantenoko ohiko jaiak. Horrela adierazi dute antolatzaileek. Azaldu dute erabakia hartu behar izan dutela beste herritarrek jarritako oztopoengatik eta zailtasun administratiboengatik. Aiararrek erantsi dute baldintza horiek soilik eurei exijitzen zaizkiela eta horregatik amore eman dutela.
Halaber, Erretes Lantenoko Jai Batzordeak aldarrikatu du 2007tik ospakizun arrakastatsuak prestatu dituela 17 ediziotan (gogoratu beharra dago tartean pandemia ere egon zela).
"Atzean geratu dira poztasun ugari, batzordeak egindako lan handia eta gazteen ilusio puxkatuak. Horrela jarraitzea merezi ez dutela pentsatzen dute gazteek eta Peregaña Igoera ere bertan behera geratu da", zabaldu dute.
Edonola ere, batzordeko kideek eskerrak eman dizkiete antolakuntzan lagundu dutenei, jaietan parte hartu eta gozatu dutenei eta, nola ez, herria bisitatu dutenei.
Parrillada jendetsua
Erretes Lantenoko jaiak hitzordu berezia bilakatu dira azken urteotan, eta Administrazio Batzarra ospakizunen ibilbidean txertatu da, jende ororentzako ekintzak antolatzen baitzituen. Bereziki ospetsua zen ehunka lagunentzako parrillada, baina baita gastronomia txapelketa, erromeria edota umeentzako ikuskizunak ere.