Aiarako EAJk mozio bat erregistratu du Udalean, ekintza zehatzak eskatzeko Israelen eta Palestinaren arteko gatazkan jazo berri diren gertaerei aurre egiteko, indarkeria gelditzeko eta giza eskubideekiko errespetua berrezartzeko.
Mozioak elkartasuna adierazi nahi die biktima guztiei, batez ere gatazka luze honen erdian bizia galdu duten 15.000 haur eta nerabe palestinarrei, baina gogoratu dituzte ere Hamasek hildako zibilak eta babesa adierazi diete Ivan Illarramendi Saizar euskaldunaren senide eta lagunei.
Mozioaren puntu nagusietako bat su-eten iraunkorra eskatzea eta Hamasek bahitu guztiak askatzea da. Giza eskubideen babesa bermatzeko Nazioarteko Justizia Auzitegiak emandako behin-behineko neurriak premiaz aplikatzearen garrantzia azpimarratu du Gentza Alamillo bozeramaile jeltzaleak.
Halaber, mozioak aldarrikatzen du herritarrentzako funtsezko laguntza humanitarioa berehala eta mugarik gabe egotea eskura Gazan, ura, elektrizitatea, elikagaiak eta sendagaiak barne. Ildo horretatik, Alamillok gogor salatu du gazatarrei ezarritako zigor kolektiboa, eta gerra-krimentzat eta gizateriaren aurkako krimentzat jo ditu, Gatazka Armatuen Legearen eta nazioarteko konbentzioen arabera.
Zisjordania ere presente
Zisjordanian egondako indarkeriaren gorakadagatik kezka adierazi ez ezik, nazioarteko komunitatearen eta Ekialde Hurbileko herrialdeen esku-hartzearen garrantzia ere azpimarratu du EAJk. Halaber, mozioak ongietorria ematen die euskal lurraldera iritsi diren Gazako herritar espainiar-palestinarrei, euskal erakundeei eskatuz pertsona horiek babesten eta haien eskubideak eta ongizatea bermatzen jarraitzea.